Takk fyrir siðast

Heil og sæl og takk fyrir síðast. Mikið var þetta indælt kvöld og börnin ykkar eru alveg einstök (eins og þið auðvitað vissuð). Það söfnuðust 30 þúsund krónur sem verða afhentar Rauða krossinum í næstu viku. Börnin voru ótrúlega ánægð með kvöldið og það var gaman að hitta þau í morgun.

Skipulag vordaga

Sund verður eftirtalda daga: 14.,16.,18.,21.,23.,25.,30.maí og 1.og5.júní

Góðgerðarhátíð 23.maí. Gestir mæta klukkan 19:00. Nemendur mæta klukkan 17:00

Íþróttadagur 24.maí. Koma vel klædd á hjóli og með nesti.

Útikennsla 31.maí. Farið í Nauthólsvík. Koma vel klædd og með nesti.

Fjallganga 4.maí. - verður nánar auglýst síðar.

Innilega 4.-5. maí. - allir gista í skólanum.

Skólaslit 7.maí. klukkan 12:00

Yndislegir vordagar

Undanfarnir dagar hafa verið alveg himneskir hjá okkur í 2.bekk. Krakkarnir eru duglegir og sjálfstæðir sem hefur nú reyndar verið aðalsmerki þeirra í allan vetur. Námsmatið stendur yfir þessa dagana og í vikunni hafa allir verið lestrarprófaðir. Ég get ekki betur séð en að þetta sé að ganga vel hjá þeim - enda með afbrigðum vel gefin börn:)
Í gær fóru allir heim með skipulag vordaganna og bið ég ykkur um að passa upp á blaðið.

Sundið hófst í fyrradag og var síðan aftur í dag. Það gekk vel og Samúel sundkennari hafði orð á því að sumir ættu frekar heima í sundi með 4.bekk.

Vinaleikur starfsmanna Sjálandsskóla hefur haft mikil áhrif á krakkana sem nú vilja endilega líka hafa vinaleik. Við skelltum því á leynivinum í gær og mun sá leikur standa fram á föstudag. Markmiðið er að vera sérlega vinalegur við einhvern einn úr hópnum sem að maður dró. Ekki er um að ræða keyptar gjafir heldur heimagerð kort, hlýlegt viðmót og þ.h.

Góðgerðarhátíðin verður næsta miðvikudag 23.maí klukkan 19:00. Krakkarnir eru að útbúa auglýsingu sem kemur heim mjög fljótlega.
Friðrik pabbi Heiðrúnar Dóru og Jakob pabbi Maríu Sólar ætla að aðstoða börnin við að elda matinn og afla matarins. Bryndís og Októ foreldrar Egils ætla að útvega drykki. Mig langar að þakka þessu fólki kærlega fyrir stuðninginn. Vegna þessa getum við gefið allan ágóðann óskertan. Við þurfum að takmarka fjöldann í hófið og miðum við að með hverju barnir komi ekki fleiri en 3. Krakkarnir verða einnig með söngatriði. Eins og áður kom fram fáið þið frekari skilaboð um hófið og matseðilinn.

Betri tíð og blóm í haga

Hjólaferðin á föstudaginn gekk heldur betur vel. Við hjóluðum alla leið inn í Kópavog og út á Kársnesið þar sem Kópavogshöfn er. Krakkarnir voru alveg svakalega dugleg að hjóla og telst okkur til að þetta séu um 8-9 kílómetrar sem við hjóluðum Þetta sýnir okkur hversu öflug þau eru. Endilega látið krakkana hjóla og hreyfa sig en úthald og áræðni styður krakkana mikið í náminu

Ungarnir eru nú orðnir stærðar kjúklingar og hafa flutt í lítið hús sem enn er haft inni í skóla. Þegar fer að hlýna þá verður húsið flutt út þar sem fuglarnir verða fram á sumar. Þá er stefnt að því að senda þá á Úlfljótsvatn þar sem skátar eru með sumarbúðir. Næsta vetur verðum við svo vonandi komin með varanlegan hænsnakofa á lóðina. Börnin hafa sinnt´ungunum mjög vel og náð góðum skilningi á lífsferlinum. Þau vita nú þegar að í hverjum hænsnahóp getur aðeins verið einn hani og eru þau nú orðin mjög áhyggjufull um afdrif hinna hananna í hópnu. Enn er þó ekki alveg ljóst hverjir eru hanar svo spennan eykst með hverjum deginum.

Nú allra næstu daga set ég hér á bloggið dagsetningu fyrir góðgerðarhátíðina en stefnt er á vikuna 21.-25.maí.

Nú erum við að rifja upp helstu aðferðirnar sem við höfum lært í vetur í stærðfræðinni og í vikunni verður væntanlega lagt fyrir lestrarpróf.

Hjólatúr á morgun föstudaginn 4.maí

Útikennsla föstudaginn 4.maí

Á morgun föstudag stefni ég að því að fara í hjólaferð með bekkinn. Ferðin mun taka allan morgunin og því er mjög mikilvægt að allir komi vel klæddir. Gott er líka að taka með sér aðeins ríflegra nesti (kannski brauð og safa). Munið bara að setja nestið í lítinn bakpoka.
Allir eiga að vera með hjálma.
Við munum aðeins hjóla á hjólreiðastígum og förum ekkert út í umferðina. Með í ferðinni verður skólaliði.
Kær kveðja Ólöf

Notum skrokkinn - göngum eða hjólum í skólann

Þá er komið að hinu árleg átaki skólans þar sem markmiðið er að koma í skólann annað hvort gangandi eða hjólandi. Átakið stendur fram til 22.maí. Langflestir starfsmenn taka þátt í keppninni hjólað í vinnuna og er mikill hugur í fólki. Síðasta vor voru nemendur skólans mjög áhugasamir um þetta átak. Ekki þarf að fjölyrða um hversu mikilvægt er fyrir alla að halda sér í góðu formi og er þetta góð leið til að stunda daglega líkamsrækt. Krakkarnir eru yfirleitt svo viljug og kröftug að það er um að gera að venja þau strax á unga aldri við holla lífshætti. Við erum líka heilmikið í umhverfisfræðslu og veltum fyrir okkur hvernig við getum mengað minna. Færri bílferðir skapa okkur öllum betra andrúmsloft og það er um að gera að ala börnin upp með þessa vitneskju að leiðarljósi.

Það er að sjálfsögðu engin skylda að koma ekki í bíl en við skráum þó samviskusamlega niður hvernig við komum í skólann.

Það er auðvitað alveg í höndum foreldra hvort þeir treysta börnum sínum að koma hjólandi enda koma krakkarnir mis-öruggar leiðir. Einhverjir foreldrar tóku þátt í þessu með okkur í fyrra og hjóluðu með börnum sínum og enn aðrir brugðu á það ráð að keyra barnið og hjólið á öruggan stað þannig að barnið gat hjólað síðustu metrana í skólann og þannig verið með.

Eitt að lokum:

ÞAÐ ERU LANDSLÖG AÐ BÖRN UNDIR 16 ÁRA ALDRI EIGA AÐ VERA MEÐ HJÁLM OG MUNDUM VIÐ AÐ SJÁLFSÖGÐU FYLGJA ÞEIRRI REGLU Í HVÍVETNA.

Mikið líf í Sjálandsskóla

Heil og sæl. Nú er aldeilis mikið líf í skólanum en eins og þið eflaust hafið frétt þá skriðu 14 ungar úr eggjunum sem við fengum send. Krakkarnir gáfu þeim nöfn og hafa fylgst með vexti þeirra á hverjum degi. Mikið hefur verið skrifað af sögum og teiknaðar fjölmargar myndir verið teiknaðar af litlu ungakrílunum.

Almennt gengur skólalífið sinn vanagang. Krakkarnir eru dugleg og keppast við námið. Flestir eru nú farnir að skilja einfalda margföldun (1-4) og finnst krökkunum ótrúlega gaman að leysa margföldunardæmi.

Í gær var haldið upp á dag umhverfisins í Sjálandsskóla. Krakkarnir í 2.bekk týndu rusl í fjörunni - hreinsuðu vermireitinn okkar og byrjuðu að sá fræjum fyrir sumarið. Þau voru mjög áhugasöm við þá vinnu.

Á morgun stefnum við að því að fara í skógarferð í Heiðmörk. Við munum fara með rútu klukkan 10 og komum aftur í hádeginu. Mig langar að biðja alla um að koma sérstaklega vel klædda.

Ég er að stefna að góðgerðarhátíðinni um miðjan maí en krakkarnir eru farin að æfa sönglög fyrir gleðina. Enn á ég eftir að festa niður dagsetninguna en ég á eftir að hafa samráð við matreiðslumennina sem ætla að aðstoða okkur við matargerðina.

Loksins aftur blogg

Afsakið lélegt upplýsingastreymi nú að undanförnu en nú verður tekið á því.
Krakkarnir komu að vonum hress og útbelgd af súkkulaði eftir páskafríið.
Einhverjir eru reyndar enn í fríi. Næstu vikurnar verða í raun tvö þema í gangi. Annarsvegar er það tilraunaþema og hinsvegar þema um egg og unga en einmitt í dag eigum við von á 24 eggjum sem sett verða hérna í hitakassa. Krakkarnir í öðrum bekk munu síðan fylgjast náið með framvindun mála þangað til úr eggjunum verða komnir ungar. Af öryggisástæðum þá vil ég ítreka að ekkert barn fær að snerta á ungunum nema með plasthönskum. við munum vinna ýmis verkefni sem tengjast þessum lífsferli. Eitthvað af því verður sjálfsagt unnið heima.
Annars minni ég á lesturinn en oft vill draga úr lestrariðkun þegar fer að vora.
Einnig höldum við áfram að undirbúa góðgerðarmatinn sem við frestuðum fyrir páskana. Dagsetning verður auglýst síðar.

Annar góður frá föstudeginum

Þegar hópueinn kom heim frá Kjarvalsstöðum þá var verkefnið að skrifa litla ritgerð um ferðina og það sem borið hafði fyrir augu. Allir voru að vinna mjög áhugasamir þegar einn nemandinn kallaði upp - Heyrðu Ólöf hvers son var hann þarna Kjarvaldur....
Já þau eru bara frábær þessir krakkar.

Börn eru alveg yndislegt

Eftirfarandi heyrðist síðastliðinn föstudag þegar annar bekkur var á leið heim úr útikennslu.

A -Þegar ég verð stór þá ætla ég sko í Háskólann í Reykjavík...
B - Ekki ég - ég ætla sko í Háskóla Íslands..
A- Það er sko miklu verra að vera í Háskóla Íslands.
B - Af hverju?
A - Út af því að í Háskóla Íslands þarf maður að læra allt um Íslands en í Háskóla Reykjavíkur þarf bara að læra allt um Reykjavík.....

Þarna gat Ólöf ekki setið á sér og fór að spyrja hvaða fróðleikur þetta væri og vildi nú leiðrétta þennan misskilning. Sagði þá A okkur að mamma sín væri alltaf með þetta rugl - hún væri alltaf að rugla blessað barnið.... þá vitið þið það...

Vikan

Síðasta vika gekk ljómandi vel. Áfram hef ég lagt mikla áherslu á vinnu í móðurmáli. Við höfum líka verið að ljúka ýmsum ókláruðum verkefnum úr síðustu þemum. Eins og flest ykkar vita var opið hús í Sjálandsskóla á fimmtudaginn var. Opna húsið var hugsað fyrir nýja nemendur og forráðamenn þeirra. Nokkrir nemendur úr hverjum umsjónarhópi voru í skólanum þetta síðdegi og svöruðu spurningum og sýndu skólann. Krakkarnir voru mjög ábyrg vegna þessa opna húss og gerðu það vel. Í tilefni af þessu tókum við líka allt í gegn - fórum yfir bakkana - hillur - skápa og skúffur. Á föstudaginn fórum við síðan á listasýningu á Kjarvalsstöðum. Sýningin heitir bernskan í verkum Kjarvals. Fengum við mjög góða leiðsögn og þið ættuð bara að vita hversu frábærir áheyrendur krakkarnir ykkar eru. Þau voru semsagt einstaklega kurteis og kunnu sig alveg 100%. Ég var alveg að springa af stolti.....

Í vikunni (mið - fim - fös) verða listadagar hjá okkur í skólanum. Börnin hafa nú þegar valið sig inn í fjölbreytt verkefni. Nánar um það síðar.

Áfram er stefnt að skíðaferð. Nú er nógur snjór í Bláfjöllum en veðrið hefur ekki verið okkur hliðhollt. Við viljum frekar bíða eftir ákjósanlegum veðurskilyrðum heldur en fara í tæpu veðri. Um leið og eitthvað verður ákveðið þá fáið þið póst.

HÁSTÖKKVARAR VIKUNNAR ERU....

EMIL ÖRN og MARÍA SÓL

- Til hamingju með það krakkar!

Þau tvö eru alveg einstaklega dugleg að lesa heima. Í vetur hafa þau lesið heima nánast hvern einasta dag og framfarirnar láta ekki á sér standa.

Vikulok

Vikan hefur gengið vel hjá okkur. Krakkarnir eru jafn áhugasöm og endranær. Í vikunni höfum við lagt áherslu á vinnu í íslensku og stærðfræði. Ég hef verið að auka kröfurnar í ritun og legg nú aukna áherslu á að vanda skrift og frágang. Nokkuð ber á því að krakkarnir séu að rugla saman stóru og litlu stöfunum í ritun og er nú kominn tími til að vinna í því. Í vikunni lagði ég fyrir Læsi - lestrarskimun og kom það almennt vel út hjá hópnum. Við erum aðeins farin að vinna með stafsetningu og finnst krökkunum gaman að velta fyrir sér þeim fræðum. Ég geri þetta mest í leik en þau eru þó aðeins farin að skrifa eftir upplestri. Það er um að gera heima að lesa fyrir þau stök orð jafnvel úr lestrarbókinni og láta þau skrifa.
Einhverjir eru farnir að slá slöku við í heimalestrinum og er það ekki nógu gott - munum að æfingin skapar meistarann.

Í útikennslu í dag fórum við upp í Flataskóla og lékum þar á lóðinni. Á heimleiðinni löbbuðum við meðfram læknum og veltum fyrir okkur hraða vatnsins. Gerðum við tilraunir með nokkur prik sem við köstuðum út í lækinn og fylgdumst með. Margar tilgátur komu um hraðann og tímann sem það tæki að komast út í sjó við Sjálandsskóla.

Nú er spáð snjókomu og við höldum áfram í vonina um að komast í skíðaferð en krakkarnir spyrja mikið um það.

Ég minni á fyrirlestur foreldrafélagsins um Litbrigði fjölskyldna sem verður í Vídalínskirkju 7.mars klukkan 20:00. Alltaf gott að bæta við sig fróðleik!

Góða helgi.

Hátökkvarar bekkjarins þessa vikuna eru........

......Lára Sif, Heiðrún Dóra og Þórdís Ragna

eru hástökkvarar að þessu sinni. Þær stöllur hafa sýnt það að þær eru sérstaklega prúðar og tillitssamar. Húrra húrra........ haldið áfram á sömu braut stelpur.

Að loknu vetrarfríi

Heil og sæl. Þá er þessu indæla vetrarfríi lokið og börnin komu mjög glöð í skólann aftur. Það var greinilegt að þau höfðu gott af fríinu. Margir höfðu lagt land undir fót og höfðu frá mörgu að segja. Nú næstu tvær vikurnar ætla ég að leggja áherslu á íslenskuna. Ætlum við að vinna aðeins með þætti eins og orðflokkana - samheiti og andheiti - einfaldar stafsetningaræfingar og margvíslega ritun. Nú undanfarnar vikur hafa krakkarnir verið mjög áhugasöm í allskonar bókagerð. Hafa þau framleitt sögur og bækur af fullum krafti. Einhverjir hafa verið að semja heima og sýnt okkur í skólanum. Þetta er mjög skemmtileg vinna og styrkið endilega börnin í þessu ef þau sýna þessu áhuga heima.
Venju samkvæmt vinnum við áfram í öðrum námsgreinum.

Foreldraviðtöl

Þá er komið að foreldraviðtölunum. Ég hef gefið ykkur eftirfarandi tíma. Ef þeir henta ekki þá hafið endilega saman.

Fimmtudagurinn 1.febrúar
8:00 Lilja
8:40 Thelma Sif


Föstudagurinn 2.feb

8:00 Heiðrún Dóra
8:40 Þórdís

Mánudagur 5 feb
8:40 Heba
13:00 María Sól
13:25 Telma Sól

Þriðjudagur 6 feb
8:00 Egill

Miðvikudagur 7 feb
8:00 Emil
8:40 Júlía Kolbrún

Fimmtudagur 8 feb
8:40 – Lára
9:00 – Júlía Hrafns

HÁSTÖKKVARI VIKUNNAR ER....

LILJA::::::::

Lilja hefur staðið sig frábærlega í náminu þessa vikuna. Hún hefur sýnt mikla einbeitingu og þolinmæði við alla vinnu. Auk þess er Lilja alltaf þæg og góð.

Hástökkvari vikunnar

Ég ætla nú á næstu vikum að taka upp hástökkvarahvatningu. Ég vel einn eða fleiri hástökkvara í hverri viku sem hafa skarað fram úr á einhvern hátt. Um getur verið að ræða sérstaklega góða ástundun - hegðun - vinskap - námsárangur og fleira. Hástökkvarinn fær með sér heim sérstakt spjald til foreldranna. Fyrsti hástökkvarinn er kynntur hér á síðunni í dag.

Í vikulok

Þá er þessari ágætu viku að ljúku. Krakkarnir hafa staðið í ströngu við úrlausnir á erfiðum verkefnum í stærðfræði og íslensku. Einhverjir hafa líka farið í lestrarkönnun. Markmiðið með þessum verkefnum er að taka stöðuna til að móta framhaldið. Námsmatið kynni ég ykkur í foreldraviðtölunum. Listinn yfir foreldraviðtölin verður hér á síðunni.

Við höfum rætt mikið um einelti og samskipti auk þess sem börnin hafa unnið ýmis verkefni um tillitsemi og stríðni. Oft verða einhverjir árekstrar en við höfum þá venju í hópnum að enda alltaf daginn á að gera upp daginn með eftirfarandi spurningum. Er einhver leiður yfir einhverju sem gerðist í dag? Er einhver sem er leiður yfir að hafa gert einhverjum eitthvað? Er einhver sem vill segja okkur frá einhverju góðverki dagsins. Börnin eru orðin mjög fær í þessu og fljót að afgreiða mál.

Eineltisvika

Vikuna 22. - 26. janúar verður, í grunnskólum Garðabæjar, lögð sérstök áhersla á verkefni sem tengjast forvörnum gegn einelti. Markmiðið er að fjalla um jákvæð samskipti og vinna með viðhorf skólasamfélagsins. Nemendur vinna fjölbreytt verkefni tengd viðfangsefninu og verða þau kynnt sérstaklega í hverjum skóla. Nemendur fá heim með sér bækling um hvað einelti er, ráð til foreldra og viðbrögð skólanna við einelti. Það er samstarfshópur skólanna „Gegn einelti í Garðabæ“ sem lét hanna og gefa út bæklinginn og veggspjöld sem minna á ógnir eineltis. Hönnuður veggspjaldanna er foreldri í Garðabæ, Sveinbjörg Jónsdóttir. Foreldrafélag Sjálandsskóla hefur sent bréf til allra foreldra í tilefni af forvarnarvikunni.

Ég sendi ykkur heim með börnunum bæklinginn og sérstakt heimavinnublað ætlað ykkur forráðamönnum. Ég hvet ykkur eindregið til að kynna ykkur efni bæklingsins og bréfsins.

Komin inn á ný

Afsakið hvað lítið hefur komið á bloggið en ég lenti í tæknilegum vanda sem nú hefur verið leystur.

Skólastarfið hefur gengið vel og krakkarnir duglegir eins og áður. Ég er um þessar mundir að safna saman og vinna í námsmati fyrir foreldraviðtölin sem verða á næstunni. Tímana set ég inn á bloggið á næstu dögum.

Venjulegir skóladagar og afmælisboð

Þá er skólastarfið komið í fullan gang eftir jólafríið. Börnin komu úthvíld og glöð eftir fríiið.Þau eru áfram námsfús og virkilega tilbúin í meira nám. Veðurþemað gengur vel en í þessari viku höfum við aðalega lagt áherslu á árstíðirnar - hvers vegna árstíðaskiptin verða. Við höfum útbúið líkan af sólarganginum og skoðað og teiknað út frá því. Þrátt fyrir ítrekaðar upprifjanir á því í hvaða röð árstíðirnar koma þá eru margir sem muna þetta ekki ennþá. Ég bendi ykkur á skemmtilega vefsíðu eftirfarandi tengli þar sem fjallað er um veður http://nams.is/snjor.

Á morgun og föstudag verð ég erlendis á kennslugagnasýningu. Linda kennaranemi kennir tímana mína en sú breyting verður einnig á kennslunni að Hrafnhildur Sigurðardóttir hefur nú tekið við kennslunni af Sesselju (farin í fæðingarorlof)sem kenndi 2.bekk 3 tíma á fimmtudögum. Hrafnhildi þekkja "gömlu" krakkarnir vel en hún sá um gæsluna í fyrra.

Nú á næstu vikum fara afmælin að hellast yfir okkur - mig langar að biðja alla foreldra að gæta þess að láta vita ef barnið kemst ekki í afmæli sem því hefur verið boðið í - mikilvægt fyrir afmælisbarnið sem upplifir jafnvel annars að krakkarnir vilj ekki koma (hefur gerst hér í skólanum að 15 krökkum var boðið í afmæli og aðeins 3 mættu og aðeins 2 aðrir létu vita) -
hugsið ykkur hvernig viðkomandi leið? Þetta er aðeins góðlátleg ábending sem mig langar að benda ykkur á. --- Hef reyndar enga trú að svona gerist í okkar bekk--- ..... Kveðja að sinni.

Lítil systir fædd

í gær 7.janúar eignaðist Júlía Hrafnsdóttir litla systir. Við í skólanum sendum fjölskyldunni heillaóskir í tilefni af þessu. Júlía á örugglega eftir að standa sig vel í hlutverki stóru systur.

Gleðilegt ár 2007

Heil og sæl öll og gleðilegt nýtt ár. Ég vona að allir hafi haft það gott og notið samvista við fólkið sitt.

Á föstudaginn hefst skólinn að nýju eftir þetta langþráða góða jólafrí. Skólahald verður þá samkvæmt stundaskrá. Mig langar að minna ykkur á að senda börnin vel klædd því við förum að sjálfsögðu í útikennslu.

Fyrsta þemað okkar á vorönninni verður um veðrið. Við ætlum að kynna okkur eftirfarandi þætti sem snúa að veðrinu.
Árstíðir - af hverju eru árstíðirnar
Ský - hvað eru ský og hvað gerist í þeim
Snjór - hvernig verður snjórinn til og hvers vegna fellur hann til jarðar
Vindur - hvað veldur vindi og hvað ræður því hvaðan hann kemur
Frost og hiti - hvað er það
Veðurorð - hvaða veðurorð þekkjum við
Hitamælar - lærum að lesa af hitamæli
Úrkomumælingar - hvernig og við búum okkur til okkar eigin mæli
Veðurfréttir og veðurtákn

Við ætlum að bjóða til okkar veðurfræðingi sem vonandi getur sagt okkur eitthvað meira um veðrið.

Mig langar að biðja ykkur foreldrana að fylgjast með veðurspánni með börnunum svona af og til þannig að þið tengjið heim það sem við erum að læra í skólanum.

Nýjar fréttir/upplýsingar á bloggið koma a.m.k einu sinni í viku - munið að kíkja reglulega á bloggið og komið endilega með athugasemdir á síðuna ef þið viljið deila einhverju með okkur hinum.

Jólaföndur hjá 2.bekk - einbeitingin skín

Jólafjör - myndir úr jólaföndrinu

Piparkökukvöldið er í kvöld

Í kvöld fimmtudaginn 14. desember verður áður auglýst jólastund hjá 2. ÓS í Sjálandsskóla.

Stundin hefst kl. 17.30 – 18.30.

Dagskráin er ekki löng, við byrjum á því að mála piparkökur og síðan sína nemendur jólaleikrit sem þeir eru að æfa fyrir litlu jólin.

Við sköffum málningu til að skreyta með en þið komið með ykkar eigin kökur. Í fyrra máluðum við stór piparkökuhjörtu og það er hægt að kaupa þau í flest öllum bakaríum.

Systkini eru hjartanlega velkomin og hver fjölskylda kemur með veitingar fyrir sig, t.d. kakó á brúsa, smákökur og mandarínur til að narta í.

Með jólakveðju, foreldrafulltrúar.

Næstu dagar

Á morgun föstudag verð ég í fríi og hún Linda kennaraneminn okkar kennir börnunum.

Ég minni alla á leiksýninguna á laugardaginn. Eftir leikritið verður kaffi í skólanum að frumkvæði foreldrafélagsins - Ég hvet alla til að koma í kaffið bæði þá sem fara á leikritið og líka hina.

Næsta þriðjudag ætlar 2.bekkur að syngja við athöfn í skólanum (á skólatíma) þegar undirritaður verður formlegur samningur við alþjóðaskólann. Við ætlum að syngja Jingel bell á ensku og alþjóðaskólinn ætlar að syngja sama lag á íslensku.

Á fimmtudaginn verður piparkökukvöld hjá 2.bekk. Foreldrafulltrúarnir sjá um að auglýsa þetta frekar.

Enn minni ég á lesturinn en við megum ekki gleyma að láta börnin lesa þó svo að jólaannir séu miklar.

Þemadagar búnir

Þá er jólaþemadögunum okkar lokið. Börnin höfðu mjög gaman af verkefnunum og margir útbjuggu fallegt jólaskraut, kerti og góðgæti sem skreyta mun skólann fram að jólum. Krakkarnir kunnu því vel að vinna í aldursblönduðum hópum.

Á myndinn má sjá Júlíu Kolbrúnu og Maríu í bakstri með krökkum úr Alþjóðaskólanum.